America Deirel Arsi CBANA.

Thuhmaihruai:


"Nan tuan dah lomi Loram ka lo pe ih nan sak dah lomi Khawpi pawl ah nan um; nan ciin dah lomi Sabit nan ei ih nan phun dah lomi Olif kuang ihsin Olif rah nan ei a si" (Joshua 24:13). tiih Israel pawl hneih Pathian thusuak hi kan Laimi pawl hnen khal ah a thleng ve a si hmang. Kan khua le kan um hngetnak ram si dingih kan mang hman ih kan ram man baan dah lonak America ram ah 2000 AD hnu in kan thleng cupco. America ih ramthen tam nawn ah Laimi kan um thluh thlang. A laang teih um dingih leeng le tlawng men si loin kan Luphumnak dingih kan vaihnak le kan um hmun hnget ah America ih kan hung um thei hi cu "leitlun thil mangbangza pakhat" cu a si ko. Pathian in a minung Israel pawl hnenih a rak tiamkammi hi a mah zumtu kannnih pawl hrang khal ah atak in a hung cang suak a si hi. Pathian ih remruahnak, khuakhannak le lamhruainak liolio a si ruangah a hmaisabik ah amah Pathian cu thangthat sunloih upat uhsi!


America ram ih Chin (Falam) tong hmang ih Baptist Church din hmaisabik hi, "Atlanta Chin Baptist Church [ACBC]' a siih 2001 kum November thla ah a rak ding a si. ACBC hin a rahsuahmi cu, "Chin Calai Seminar", tuah hi a siih himi peh in Chin Pawlpi, USA tiang a rung ding suak. A pahnihnak Baptist Kawhhran rung ding cu, "Falam Baptist Church, Maryland [FBC.MD]' a siih Frederick khua ah 2004 kum July thla ah dina  si. FBC,MD hi nauhak deuh a si vekin a U a simi ACBC hin a cawmdawl, a cangcawi, a khur-om ring ring. ACBC.GA le FBC,MD cu unau kawhhran (Sister Churches) an rak si. (Kawhhran hmin pu loin "Indiana Burmese Christian Fellowship [BCF] Falam tong hmang' titin 2001 kum ah Indianiapolis Burmese Christian (BCF) ihsin Bethel Church of Indiana [BCI] tiin 2007 ah pehzom a si leh.)


Cutincun America ram ah Chin,i kan thleng tam vingvo ih kannih Falam mi pawl khal kan pung vingvo. Chin mi cu Khrifa kan si vekin kan thlengnak kip ah Biakinn kan hawl ih kan khawm. Pathian kan bia ih lungawithu kan sim. Minung kan hnihthum deuh cun kanmahte cio Kawhhran ding in Pathian kan be khawm. Pawl (denomination) hmin ih ding kan um vekin Christian pawlkom hmin ih ding khal kan tam thotho. Pawl hmin khal in siseh, pawlkom khal in siseh, kan din tikah kawhhran rawi-aw ih khawm tlamg a si aw cio. Thimnak ah, Falam Baptist Church kan ti hman ah Baptist pawl lawng tel loin AG, Revival, gospel Baptist, Methodist, Presbyterian, Roman Catholic, Jehovah, tvp.., komkhawm awk cio a si. Duhnungza le a then awknak le huat awknak pawl cu America kan thlen hnu cun ken nawn lo ding hi kan zuambikmi le kan forh awk bikmi a si fawn.


Unau Khawhran a simi ACBC le FBCM cu thu le hla lawng ih hlaral ih tuamhlawm awk si nawn loin Kawhhran sungtel zate khat le khat neel-aw le hmunkhat ah thlacam khawm dingih khuakhannak a um thlang. Nauta deuh a situ FBCM cun a u ACBC hnenah 2008 May 24-25 ah a vung tlawng. Cuti'n Pathian biakkhawmnak le thlacam tlangnak an nei. ACBC khal in vok a rak that. May 24 zarhte zaan khawm ah FBCM ih DEacon pakhat a simi Rev. Khuang Lian Kap (tleicia) in thuthangtha simnak a nei. (Rev. Khuang Lian Kap hi kawlram Presbyterian Chin Synod ih hotulam ih tel baan Presbyterian khawhhran ih dinmi Tahan Theological College ah Professor a tuanlai ah America ah M.Th zir dingih thlahmi a si. M.Th a theh hnu ah a nufa thawn Frederick khua ah umhmun hnget khuar in an um. Mai tong te hmang ih mai' u,nak khua ih dinmi FBC.MD kawhhran ah tel in Deacon a tuan laifang 2009 kum ah Pathian hnenah in fehsan).

May 25, 2008 zarhpi suun 11:30 am ah thurel tlangnak an nei. Meeting kaitu pawl cu;

  1. Rev. Biak Ceu  Pastor, ACBC
  2. Rev. Khuang Lian Kap Deacon, FBCM
  3. Pu Phun Kar Thang Hotu, FBCM
  4. Pu Lal Nei Mang Sungtuan, FBCM
  5. Pu Sui Lian Deacon, FBCM
  6. Pu Thang Hook Lyan, Deacon, FBCM
  7. Pu Van Lian Kio Hotu, ACBC
  8. Pu Tin Ko Sungtuan, ACBC
  9. Salai Lian Uk Lyan Sumkil, ACBC
  10. . Pu Jacob Lian Deacon, ACBC

Meeting hohatu dingah FBCM ih President Pu Phun Kar Thang an hril hnuah meeting an thok. "America ram kan thleng hnu cun kan sinak hlun (Pawl, Sinak, Then awknak) pawl taanta in hmunkhat teih duhdaw aw le lungrual teih Pathian hmunkhat teih biak tlang ding" hi kan zate ih saduhthath a rak si cio. Cutivek ih kan komkhawm awk thei lawngah kawhhran pakhat lawng ih kan tuan thei lomi cu komkhawm in kan tuan thei dingih kau le cak deuh in kan feh thei ding a si, timi khal kan lungduh a rak si thluh. Thu tampi kan ruah khawm awk hnu ah kan relcatmi pawl tla cu,


Tumthami pawl;

  1. Pathian hmin in kan ram le miphun hrang thei tawk tuan tlang thei dingah pawlkom pakhat din ding. A hmin ah, "Chin Baptist Association, USA", ti a si ding.
  2. Chin (Falam) lakah Pathian hmin in hnatuan tlang theinak nei dingin zuam ding.
  3. Midang hnen khalah siseh, midang thawn khal in sis3eh, Pathian hnatuan tlang thei zuam ding.

A hmaisabik kekar daan ding pawl;

  1. Pehzom awknak hrangah kumkhua ngahmi tithe (1/10) ih 5% thawh ciar ding.
  2. A malbik kumkhat veikhat le a tul daan vekin thurel tlangnak neih ding.
  3. Himi CBAUSA hohatu ding cu a haha te'n kumkhuat tete in zem awk siseh..... (a thawhnak 2008 cu FBCM ih hotu cu CBAUSA hotu si dingin lungkim a si.)
  4. America um Falam tong hmang Kawhhran pawl hnenah sawmnak neih ding.

"Baptist" tiih Pawl hmin pakhat kan bun ruangih a thatnak le a siatnaklam pawl kan relkhawm. "Baptist" tiih hmin kan sak a sile Baptist si lomi kan Falam unau pawl in zom/kom duh lonak ah an hmagn pang pei maw.. timi thu a hung suak. Thil cang thei cu a si ko. Khatlam kap lala ahcun - "Pathin hmin in hnatuan thupi kan tuan duh taktak ahcun Cin le Daan nei deuh ih feh le kaihhruai awk cu a tul rori a si. Fellowship timi pawlkom men,en ih thlahthlam deuh ih kan feh asile rei in daih lo men ding hlei ah hna thupi khal kan tuansuak thei zik lo", tiih thukung ruattu an tam deuh. Curnagah kan Chinmi pawl ih kan sinak le kan neelbikmi "Baptist": timi hmin hi vuah ko uhsi! tiin zate lungkimnak thawn. "Chin Baptist Association, USA", tiin kan Pawlkom hmin cu nemhnget a si. Kan Chinmi, a hleice in Falam mi, in siatsuah ih hmailam nor ding in dwkhamtu, 'Pawl' thenthek duhnak thinlung cu kan taantanmi Kawlram ah taanta cio ih America ahcun thinlung thar, ruahnak thar, tumtahnak thar thawn Pathian hna ahcun thinlung thar, ruahnak thar, tamahnak thar thawn Pathian hna tuan cio uhsi law" timi hi CBAUSA ih a duhbikmi le a tuah tummi cu a si. Kawhhran hruaitu upa pawl meeting an neih sungah Nu pawl khal thlacam phah in thunuam an rak rel ve. Mino pawl khal anmah te thurel tlangnak an rak nei ve.

A hmaisabik CBAUSA hruaitu pawl cu;

  1. Hotu                                                   Pu Phun Kar Thang
  2. Hotu Saang                                       Pu Van Lian Kio ( ACBC, hotu)
  3. Sungtuan                                           Pu Tin Ko ( ACBC sungtuan)
  4. Sungtuan ruantu)                             Pu Lal Nei Mang ( FBCM sungtuan)
  5. Sumkil                                                Pu Khuang Lian Mang ( FBCM sumkil)
  6. Sumkil Bawmtu                                Salai Lian Uk Lyan (ACBC sumkil)
  7. EC Members                                     ACBC le FBCM ih Deacons zate an tel.

Cuticun Pathian remruahnak dil ih CBAUSA a hung dinsuah ni (May 25, 2008) cu CBA ih suahni a hung si cih. Meeting theh in aCBC ih timtuahmi rawl cu rangzet in kan hil khawm. Rawl ei theh vete'n biakkhawmnak kan nei. Nipi suun biakkhawmnak ahcun CBAUSA ih hotu Pu Phun Kar Thang in, "Tho in din saal uhsi!" timi thulu hmang in Pathian thu simnak a nei. America ah akn din thar hmaisa dingih kan ram ah kan hei phur kir saal ding timi ruahnak thawn a sim. Zaan biakkhawm ah innteek Pastor Rev. Biak Ceu in thuthangtha simnak a nei.

2008 kum a cem ih zomnak paisa kan hur bur tikah a zagtein $5756.57 (ACBC $32756.57, FBCM $2500.00) kan ngah. Zung hnatuan le khualtlawn ding kan neih hrih lo ruangah kan thawhmi hmaisabik paisa cu midang bomnak hrangah a zate'n hman kan tum. Himi kan ngahmi sumpai hi hman naklam kan ruah tikah, 'Pathian thuhla le sisi, kan tong ih ngan mi le sisi, kan Chinmi dang pawl hman ih an neih thei hrih lomi, "Hre Kio Commentary", suahnak dingah lungtho tein a zatein ($5756.57) kan pek a si.


CBAUSA a din thok ihsin kan thuhla in rak thlingthla ih ra tel ding a hngakhlap zettu Kawhhran cu Chin Baptist Chruch, Greenville, South Carolina an si. An pastor cu Rev. Sa Tin Lal a si. an kawhhran ih sawmnak vekin a vei khatnak CBAUSA meeting cu CBCG ah neih a si. CBCG hi CBA ih luh an duh ruangah siseh, an Pastor hi an khawmnak innteek kawhhran le CBA ih hriakthih pompinak neih ding duhsan ruangah siseh, an khua rori ih CBAUSA meeting tuah ding in sawm sannak a si. October 25, 2009 ni ah meeting neih a si ih Pastor pa 4 - Rev. Dr. Stephen Hre Kio, Rev. Biak Ceu, Pastor San No Thuan, Pastor Sa Tin Lal tel in upa 16 kan si. Pastor Sa Tin Lal teih run innpi thar sungah mikhual hmuah hmuah kan riak ih rawk khal cutawk ah kan ei cih thluh.

Himi meeting ih kan relmi thupi deuh pawl cu:

  • CBA: Chin Baptist Association timi hmin hi pehzom in hmang ding.
  • Kawhhran (Church)/ Pawl (Denomination) nei/ bunmi Kawhhran dang pawl cu sungtel dingah sawn hrih lo sehla.
  • nauhak le Upa Sunday School nei thei ding.
  • Feh daan ding Daan le Duun ( Constitution) tuah ding.
  • America ramsung, a hleice in CBA sung, thawngphawktu dingah Kawlram ihsin Pastor pakhat khat sawm ih kawh ding.


A Hmaisabik CBAUSA Kawhmpi. ACBC May 29-30, 2010

Unau Thei Pum Seu


May 29-30, 2010 ah Atlanta Chin Baptist Church ah hmang a si. Innteek ACBC in Pastor thar, Rev. Dr Khaw Lian Uk, an rak nei zo. FBCM ih Pastor San No Thuan tla 2009 ah ordination pek a si zo ruangah ordained pastor pa 5 neih a si thlang. Khawmpi ih kan thuken cu - "Unau theipum Seu", ti a si. America a thleng Chinmi pawl kan zummi le bang aw, kan thiawh le bang aw, ziang ruangah kan biakmi Pathian hi thinkhat lungkhat te'n kan ren tlang thei lo ding timi hin kan thinlung in sawh nasa. Theipum seuh-awknak kan cutuk zo lo maw?

CBAUSA din hnu ih a vei 2 nak meeting pi cu ACBC ah May 30, 2010 suundir ah neih a si. Meeting kaitu upa 17 le Kawlram ihsin u le nau ra tlawng phah ih khawmpi in hmanpitu Rev. Dr. CJ Hrang Hmung tla kan si.

Thurel mi Thupi pawl cu:

  • CBAUSA timi hmin hi thleng nawn loin hman ring ring ding,
  • America um Falam tong hmang Karwhhran pawl hnenah CBAUSA ah ra tel in Pathian hnatuan tlang dingin sawm ding,
  • Daan le Duun zoh saal ih tha deuh ih neih ding.
  • a vei 2 nak Khawmpi cu 2011 kum May ah FBCMD ah neih ding. ti pawl an si.

2009 kum pehzomnak paisa burmi zatekom cu $7973.09 (ACBC 2617.56 le FBCM $4707.50) a si. Cumi sung ihsin Zomi Theologica College (ZTC) a tu ih CCIT Chin Institute of Theology le Bethel Theological Seminary pawl hnenah $2000,00 ve ve bomnak pek a si. 2008 hnak cun malte kan thangso dewh.


A vei 3 nak tlangsuak kum lai meeting pi cu September 25,2010ah FBCM ah neih a si. Himi tum ah CBAUSA ih Daab ke Duun pawl tuah fel a si. Thupizet relcatmi pakhat leh-cu CBA hi USA ram sung lawng si loin Canada um kan milesa Kawhhran in zoom in duh thlang ruangah kan hmin khal CBANA ( Chin Baptist Association, North America) tiin kan thleng a si. March 19, 2011 ah Falam Baptist Church, Battle Creek, Michigan ah a vei 4 nak meeting kan tuah tikah cun sungtel kawhhran 7 kan si thlang ih kan tha a tho sin sin. Pekzomnak sumbur lta $20,000,,00.00 tlun a si thlang. Kan relmi thuibik cu Kawlram sungih pathian hna kan tuan tikah Pawlko, hngehkhoh a si mi FBP ( Falam Baptist Pawlkom) thawn tuan tlang ding tiih lungkimmi hi a si. Himi tum meeting ah 2011-2012 kum CBANA hruaitu ding pawl tuanvo pek/zem awknak kan nei.


  • Rev. Sa Tin Lal                                Tin Lal
  • Rev. Khaw Lian uk                          Vice President
  • Pu Lal Nei Mang                            Secretary
  • Rev. Ci Lian Kap                            Joint Secretary
  • Pu Thawng Lian Kar                     Treasurer
  • Pu Tha Nei Luai                             Assistang Treasurer

Himi hruaitu hril tharmi pawl hi 2011 May ih a vei 2 nak CBANA khawmpi lawngah tuanvo pek awknak neih a si leh ding. Sungtel Kawhhran vehvaih awk ding khal thupizet in kan rel.



A vei 2 nak CBANA Kawhmpi, Falam Baptist Church, Maryland. May 28-29, 2011

Tho in Din Saal Uhsi


A vei 2 nak CBANA Khawmpi cu Frederick, Maryland ah My 28-29, 2011 ah nuam dupdo ih hman a si. Khawtluang mikhual (400) cu Hotel rori ah riahter thluh an siih tlunah zing, suun, zaan rawldo thluh an si. Thlarau Thianghlim in a ceencilh ti a lang nasa. Thangthat hlasak tikah zabawng ih lam dupdo phah in Pathian an thangthat cio.


Kawlram ihsin thlaraulam ih kan Pa pakaht a simi Rev. S. Hrang Kap Hnin tla kan sawm veikin dam le cak tein in ra telpi thei ih thu le hla ah kan phur in kan tlai nasa. Cun Rev. Dr;. Stephen Hre Kio khal in thu thatha in zirh phah ih kan hlawk nasa. Himi khawmpi ah Hotel man, ei-in le ziangkim cemmi hi $30,000.00 zikte a si. Inntek FBCM cun an cemzet nain Pathian a sunlawi zia a langmi an hmuh tikah luang in Pathian an thangthat riangri sawn a si. Himi  Khawmpi ihsin CBANA in Nubu le Mino pawlkom tiin Fellowship din thok a si thlang. Himi khawmpi ah CBANA Hotu sinak cu Pu Phun Kar Thang,(2008-2011) ihsin Rev. Sa Tin Lal hnenah hlan awknak neih a si. 


A malbik kumkhat vei khat cu Executive Committee (EC) meeting neih ring ring a si. A vei & nak EC meeting cu November 12, 2011 ah FBC, Charlotte NC ah neih a si.

A vei 3 nak CBANA Khawmpi. Falam Baptist Church, Indiana. May 22-23, 2012

Thlarau le Thutak in

Thlarau le Thutak In timi thuken thawn FBCI ah khawmpi a vei 3 nak neih a si. America ah laimi kan thleng tam thlang vekin khawmpi teltu khal kan karh vingvo.

A vei 11 nak EC Meeting cu Chin Community Baptist Church, Philadelphia ah neih a siih CBC (ZBC) General Secretary Rev. D. Ngun Thawng Mang le CCIT (ZTC) Principal Rev. Dr Law Ha Ling tla a laang tein in telpi. Hi meeting ah Thlanglam Lairam (Southern Chin) ah Mission hnatuan ve dingih sawm kan sinak cu lungawi tein kan cohlang ih tuan suak thei dingin thlacamnak thawn kan relcat. CBANA sungtel kawhhran (16) a si thlang.

A vei 4 nak CBANA khawmpi. Chin Community Baptist Church, Atlanta  May 23-25, 2014

Ti Thuknak lam ah

A vei 4 nak Khawmpi cu Chin Community Baptist Church, Atlanta, GA in inntek laak in, "Ti Thuknaklam ah" (Luke 5:4) timi thuken thawn sunglawizet in tuah a si. CBANA sungtel kawhhran (27) kan kim thlang. 2013 kumcem pehzomnak cu $90,000.00 a kim thlang. CBANA ih khuallian a simi Rev. Run Herh Liang (LBA-G/S) le Rev. Lian Thuama (FBA-AG/S) pawl in in telpi thei ih kan buhlumzet. CCIT ihsin Rev. Dr. Za Hlei Kap khal in in telpi ve ih kan lung a awi cio.


CBANA General Council Meeting cu May 2013 ah Midlang Chin Christian Fellowship ( MCCF), Texas ah tuah a si. Himi tum ah cBANA in Chindwin Mission Field nei dingin siseh, CBANA cu President role ihsin General Secretary role ih hruai aw dingin siseh, thurelnak a nei. Hruaitu pawl cu (sumkil le a bawmtu siar lo) Pastor pawl si hngai seh, tiin Daan ah ret a si.

Text...

2013-2014 kum2 sung CBANA hruaitu pawl;


Official Bearers (OB):

  1. Rev. Dr. Biak Hlei Mang                           President
  2. Rev. Hre Mang                                          Vice-President
  3. Rev. Sa Tin Lal                                          General Secretary
  4. Rev. Biak Lian Thang                               Associate General Secretary
  5. Pu Phun Kar Thang                                  Treasurer
  6. Pu Siang Mang                                         Assistant Treasurer

Executive Committee Members (EC):


  1. Pu Lal Nei Mang
  2. Pu Tin Ko
  3. Pu Tha Nei Luai
  4. Pi Van Ri Hoi


Department Heads/Directors:


  1. Rev. Ci Lian Kap                                       Evangelism & Mission Director
  2. Rev. Dr. San No Thuan                            Youth Director
  3. Rev. Caleb Van Nei Kam                        Development Director
  4. Rev. Joseph Run Cung Mang                 C.E Director
  5. Pastor Lal Ruat Thang                            Women Director
  6. Rev. Reuben No bual Hrang                  Calai le Nunphung Director
  7. Rev. biak Ceu                                          Ministers Council Chairman

2007 May 25 ih Pathian dinmi CBANA cu 2016 ahcun kum (8) a kim thlang. Sungtel Kawhhran (2) ihsin Kawhhran (35) a si thlang. America le Canada ih Falam tong hmang Kawhhran zate hi (40) tluk a um. Pehzomnak paisa burmi hi $5500.00 (2008) ihsin $180,000.00 (2016) a kim thlang. North America thleng Falam mi zate in Pathian thu thei ih Pathiang hrangih nung theutu si cio ding hi CBANA ih a tumtahmi thupibik pakhat a si. Curuangah CBANA ram sung Kawhhran le a dang Falam mi pawl Pathian thu ih vehvaitu dingah Evangelist pakhat cu kum (3) thlah a rak. Sungtel Kawhhran khat le khat siseh, ahleice in Pastor nei lo kawhhran pawl hnenah Pastor neitu kawhhran pawl in vehvaihnak an neih sak.

CBANA Ram leng Mission Hnatuan nak


CBANA ram sung lawng si loin a lenglam khal suak in Pathian hnatuannak a nei tho tho. Thlarau hlo runsuak ding hi CBANA ih lungthlitumsangbik a si vekin 2013 April ih thokin Chindwin Mission field ah Missionary (32) thlah in ramthing (Pathian thei hrih lonak ram) ah hna a tuan rero. Missionary thlah men lawng si loin thlahmi Palai pawl hrang zirnak a tuah sak bet. Zumlotu pawl hrangah Christmas tuah sak in Pathian thuthangtha simphuan theinak lamzin a hawl sak. Chindwin Mission Field hnatuannak hrangih a tulzetmi Mission Center Innpi khal kawl paisa Ting (50) cem ina sak zo. Himi hnatuannak hi Pathian in a theihpi ruangah thlarau hlo minung (40) tluk kumkhat sungah rundamnak an ngah. Halleluiah! Chindewin Mission Field lawng si loin 2014 June thla ihsin kan unau a si ve mi Thlanglam Lairam, Mindat, Kanpalet, Paletwa (MKP) ah Mission hnatuan thar a tok lala zo. (Anmah MKP ih sawmnak vekin). Missionary (30) tluk thlang in Pathian ram hrang hnatuan thupi a thok leh a si. Pathian kut cak ring in ralthazet in ke a kar suak leh.

CBANA hin ramthin mission hnatuan lawng si lo in Chinram Falam ih um Chin Christian Institute of Theology (CCIT) le Kalemyo - Tahan ih um Bethel Theological Seminary (BTS) pawl khal ah a thei tawk bomnak a pek hngai. CCIT Tlawng Zirhtu pawl umnak ding hrang dot hnih Innpi cu $25,000.00 cem in a sak sak zo. CBANA Nubu pawl khal in CCIT zirhtu saza inn pakhat a sak sak zo vek in BTS  ih an tulzetmi Internet khal $3000.00 tluk cem in a hei bun sak zo. Cuih tlun ah 2016 ihsin thokin BTS ih casiar buk (Library) khal a sak sak rero lai a si.


Pathian hmin ah Falam mi pawl duhdaw awzet le nel awzet ih komkhawm awk thei hi cBANA in a sunmang thupi pakhat a si tho tho. Curuangah cBANA hruaitu pawl Rev. Biak Hlei Mang, Rev. Sa Tin Lal, Pu Phun Kar Thang le Rev. Ci Lian Kap cu Falam mi pawl lakah thangphawknak va suahpi ding in Kawlram ah a nei thlah hngai. FBCY, FBCM (Mandalay), LBA, FBA, CBC, CCIT le BTS hmun pawl ah veihvaihnak an nei ih thu le hla ruah khawm awknak an nei vingvo. Kawlram sung um Falam mi biaknaklam hotu pawl (Baptist Kohhran ihsin an thok hrih), FBA, LBA, FBCY, FBCM thawn 2013 December 9-10 ah Chawngtha (Pathein kinag) beach ah hruaitu (79) tluk cu tongkhawm aw in thurelkhawmnak an neihpi. Himi vek Falam mi zate lamdangzet relcat vutvomi an neih thei hrih lo hmangah khat khat htieh thiam awknak a karhterzet ih hmailam ih feh khat le tuan tlang daan ding lamzin ruangzintu le lamsial saktu a si thu kan hmuh thikah Pathian hnenah lungawithu kan sim cio a si.

2016-2018 tiang CBANA hruaitu ding pawl


2015 May B/M thurelnak vekin 2016-2018 tiang CBANA hruaitu ding pawl:

  1. Rev. Mangkheng Biakceu                      President
  2. Rev. Dr. Khaw Lian Uk                           Vice-President
  3. Rev. Sa Tin Lal                                        General Secretary
  4. Rev. Biak Lian Thang                             Associate General Secretary
  5. Pu Phun Kar Thang                                Treasurer
  6. Pu Van Lian Khup                                   Assistant Treasurer

Departments

  1. Rev. Ci Lian Kap                                      E&M Director
  2. Rev. Dr. San No Thuan                           Youth Director
  3. Rev. Thang Moi                                        C.E Director
  4. Rev. Lal Ruat Thang                                Women Director
  5. Rev. Joseph Run Cung Mang                Literature & Culture Director
  6. Rev. Dr. Hre Mang                                    Development Director
  7. Rev. Dr. Biak Hlei Mang                            Ministers Council Chairman

E.C Enlargment                                                  E.C Members

  1. Rev. Kip Thian Pau
  2. Rev. Reuben No Bual Hrang
  3. Rev. Caleb Van Nei Kam
  4. Rev. Kap Lian Thang
  5. Rev. Thomas Sui San Lal
  6. Rev. Philip Than Htun
  7. Pa Siang Mang
  8. Pa Cng Thawng
  9. Pa David Tin Cung
  10. Pa Van Lian Kip
  11. Pa Jacob Lian
  12. Pa Van Bawi Lian

Thunetnak:


Kawhhran pakhat lawng ih kan tuansuak thei lomi hi komkhawm awk cun kan tuan thei deuh cuang. Cuvekin CBANA ahhin thazang la in Pathian ram hrang le kan milesa le kan ram hrangah tanllk cio dingin himi ca ihsin kan sawm bet a si. America ram ih Pathian ih in kuat thlengnak asan hi mahte nuntu khuasaknak hawl men ding lawng si loin Amai' hrangah cak deuh le kau deuh ih tuan tlang dingah in duhsak a si. Pathian in CBANA hi a ram hrangah run hmang sin sin rham seh law. Sungtel Kawhhran kan zate khal Pathian duhdawtnak parah lungawithu simnak thawn cak sin sin le hnget sin sin in pehzom aw in a ram hrangah hmainor sin sin uh si.


Hminsin:


CBANA hin a tlin tawk hna a tuan tikah Pawl/Kawhhran pakhat lawng le Mibut pakhat lawng hmuitin in a tuan tum lo. A cang thei tawk le tlin tawk in mitampi/mibur thahnemnak hrang tumtah nei in a tuan zo vekin tuan rero lai ding khal a si.

CBANA

Amaih hmin sunlawinak dingah Pathian in Chin miphun pawl hi tumtahnak a nei tiin kan ruahsan. Curuangah Pathian kan ttihzah ding cu a thupibik miangmo. Kum 2000 sung kan lut veten Chinmi tampi North America ramsung luh theinak sangkaa in onsak. Pathian biakkhawm tlangnak nei dingin kan thlennak khua ciar ah kan zuam cio. Suahkehnak kan nui’h ttong ten Pathian kan biak tluktu a um lo, kan diriam ih thazaang kan ngahnakbik a si. Cuticun, kan nu ttongfang ten Baibal Thianghlim, Khristian Hlabu rak tawlreltu biaknak pawlkom pawl siseh, ttong lettu le hla phuahtu pawl siseh, a hmangtu le nuncilhtu seenpi siseh kan lungawi.

December 2021, in Chin ttong hmang kawhhran “Atlanta Chin Baptist Church” (ACBC), Georgia ah dinsuak a si. Cuvekin, “Falam Baptist Church, Maryland” (FBC,MD) cu Frederick, MD khua ah July 2004 ah hramthlak hram a thok. Hivekin American leilung ih kan ttong ten kawhhran a um cu Pathian hnenah kan lungawituk. ACBC in amaih Sister Church dinhmun in kumkhat sung lai thlakung zonnak a nei. Pathian kutcak a langih kumkhat kimcam hlaan ah FBC,MD cu kawhhran pitling dinhmun a laak thei. Curuangah, an unaute cu Jesuh Khrih ih pumkhat sinak in siseh, Laicin seempi unau sinak thawn siseh duhdaw-aw ten khua an rak sa tlang.

May 25, 2008 ah FBC,MD sungtel zate cu ACBC,GA ah Gospel Team tlawng in Atlanta, GA khua ah Pathian thangthat tlangnak a nei. Hi ttum ahhin unau zaleen zet ten thuhla ruatkhawm dingah totlangnak an nei. Chin ttong hmang Baptist Thurin pomtu kawhhran pawl pawlkom-awknak nei ding ruangzingnak le throwukhiahnak an rak nei. An thuhla fuunkhawmmi cu a hmin ah “Chin Baptist Association, the United States of America” (CBA, USA) tiin bun a si. Pawlkom pakhat a hlawhtlin ih hngetkhoh in tthansonak hna a ttuan suak theinak dingah

thunkhawm dingmi (Contribution) rikhiahnak khal an rak tuah. An lungkim tlangmi cu kawhhran ih tthenhra tthenkhat (1/10) ngahmi sung ihsin zateek panga (5%) komawk ding a si.