Hruaitu tha timi cu ziang a si?

Hruaitu tha.


Hruaitu pakhat  in member zaten hmin a thei theh lo hman ah a hrek tal cu a theih a tul. Mi hrek cu fiangten mi an sim thew ih a hrek cu an thup aw thew. Mihrek cu ziang kim ah mi an bawm, hna an tuan ih mihrek cu ziang kim hi a siat lam lawng lawng an hmu. Hruaitu pakhat in kha mi pawl kha thleidannak um lo ten kom thei le hurai thei a tul. Zumnak bang aw lo, ratnak hmun bang awk lo hlir kan si tikah ruahnak, sinak, theihnak le tuahnak phun phun kan um.


Mihrek in hla kan sak mi hi hla hlun lawng lawng sak kan duh, mihrek in le santhar hla pawl sak an duh. Mihrek in a thar te te an duh vivo ih a hrek cun tuah kel te thleng lo in tuah ring ring kan duh. Hrek khat tla cu biakinn an rat tikah an tonak hmun teng teng ah to an duh, an tonak ah mi an rak to pang len an thin heng ih khawm tla an peih nawn lo. Hrekkhat mino pawl cu an tuah peih, an tel peih zet nan an thiamnak in a deih lo. Hrekhat la la cu thiamnak an nei zet nan an thiamnak hi mi an hlawm siang lo. Tangdornak an nei lo tikah zohman in an pawl peih lo. Hmailam can saupi tiang hmu tutla kan um, can tawite sung ih lungkim rero tla kan um tho tho.


Ziangvek kan va si khal len huatawk loten kutkai aw in hruaitu tha pakhat in hruai vivo ding a si. Tthimnak ah mino pakhat in hla kan zir lai ah a ra ih hla zir lai mino pakhat kha a dang ah a hruai suak, cutik ah hla zir ding ah maw na ra, mi hruai ding ah maw na ra kan ti tikah neta cu a ra peih nawn lo. Hruaitu timi cu nu le pa vek kan si. Midang hnak in thinlung, thlarau le tang dornak thawn kan um a tul. Netabik ih to duh an um bang in, a lai ih to le hmaisabik ih to tla kan um tikah kan zaten bangram ten kai hruai ding hi hruaitu ih hnatuan pakhat cu a si.


Hruaitu ti tikah suah keh hruaitu kan um. Mi hruai an thiam zet ih mi an hruai tikah thluntu an nei tam zet. A dang lala cu zir cawp hruaitu timi a um lala. Hruaitheinak (Parami) cu a nei lo nan thu dang dang ruang ah hruaitu pakhat ah an rung cang tikah hruaitu sidan, kai hruai dan pawl an zir vivo ih an thiam vivo. Ziang khal va si sehla kan zaten zir cop hlir kan si tikah zir ring ring kan si. Suahkeh hruaitu pakhat tla a zir vivo a silen a tha dewh dewh ding ih a thiam vovi ding. Hruaitu na silo hman ah zir rero ding na si.


Zir cop hruaitu.

Hruaitu kan si ah cun can lak in thaten kan zir a tul. Bible study hmun thleng lawng ih bible siar cop, ruat cop tivek pawl kan hlawn a tul. Thaten, tuanten kan zoh ih kan study a tul. Mino pakhat kha Jesuh thu khui ah a um ti ka sut tikah Saam sung ah a um in ti. Cabit rah hi a kung thawn a peh aw lo ah cun a rah a rah thei lo vek in ka n nih tla Christ thawn kan peh zom awk lo len kan nun tla hi a ro vivo ding ih a siat lan ta ding. Himi hi na lung kim a silen bible siar ring ring aw. Kan nih hi Khrih ih a hne pawl kan si.Bible kan siar lo study kan tuah lo ah cun kan thin tla a heng ding, deih nak le hnangam nak a cem vivo ding, a hla vivo ding.